శ్రీ లక్ష్మీ గణపతి స్వామివారి వైభవం & మహత్యం

ముఖ్యంగా స్వామి వారు పిల్లలు లేని వారికి సంతానం ఇవ్వడం, వివాహం కాని వారికి వివాహం జరిపించడం, మంచి ఉద్యోగం లో స్థిరపడేటట్లు చేయడం, పిల్లలకు విద్యపై శ్రద్ధ ఉండేటట్లు చేయడం,అన్యోన్య దాంపత్యాన్ని ఇవ్వడం,సంకటాలనుండి రక్షించడం,రైతులకు గిట్టుబాటుగా పంటలు పండేటట్లు చేయడం, వ్యాపారులకు మంచి ఉన్నతిని ప్రసాదించడం,నూతనగృహ నిర్మాణాలు మహిమలుగా చెప్పవచ్చును.

వారి కోరికలు తీరిన తర్వాత వారి మొక్కుని బట్టి కొత్త రూపాయిలతో దండలు గుచ్చి స్వామి మెడలో వేసి ఆనందించడం స్వామి ప్రత్యేకతగా చెప్పవచ్చును. సంతానవతులైనవారు పిల్లల బరువుకు సరిపడే రూపాయి నాణేలు,పటికబెల్లంతో తులాభారం స్వామి సన్నిధిలో వేయడం మరో ప్రత్యేకతగా చెప్పవచ్చును.

స్వామివారి నెల రోజుల అలంకరణ సమయంలోసేవ చేసిన యువకులకు మంచి ఉద్యోగాలు, ఉన్నత చదువులకు మంచి విద్యాసంస్థలలో,విదేశాలలో సీట్లు సంపాదించి, అభివృద్ధి పథంలో ఉన్నారు.అంతెందుకు స్వామివారిని నమ్మిన వారికి కొదువ లేదు.

ఇక సంవత్సరం పొడవునా ,ప్రతీ బుధవారం, విశేష అర్చనలు,అభిషేకాలు జరుగుతున్నవి.విశేషించి ప్రతీ నెలా వచ్చే సంకష్టహర చతుర్థి నాడు తెల్లవారుజామునుండి విశేష అభిషేకాలు, పుష్పాలతో, గరికతో,విశేష పూజలు భక్తులు అత్యంత శ్రద్ధతో జరుపుకొంటారు. స్వామివారిని కొలవడంతో తమ సంకటాలు అన్నీ తొలగి ఆనందంగా జీవిస్తున్నామని గ్రామంలో ఏ ఒక్కరిని అడిగినా చెబుతారు.

మరి ముఖ్యంగా గ్రామంలో ఎవరింట వివాహం జరిగినా మొదటి శుభలేఖ స్వామివారికే ఇస్తారు.ఆ తర్వాతే బంధువులు, స్నేహితులకు ఇవ్వడం,స్వామివారిని తమ కుటుంబ పెద్దగా భావించడం,వారికి స్వామివారిపై గల అపార అభిమానానికి గుర్తుగా భావించవచ్చును.